Nagpahibalo ang Persons with Disability Affairs Office (PDAO) Iloilo City sa publiko kun paano mahibaluan kun peke ukon fake ang isa ka PWD ID sang isa ka residente sang Iloilo City.
Kasunod ini sang mga reports nga madamo na sa bilog nga Pilipinas ang nagagamit sang fake PWD ID, apisar pa nga indi man ang mga ini kabahin sang nasambit nga komunidad.
Sa interview sang Bombo Radyo kay Eleanor Gregorio, head sang PDAO-Iloilo City, iya ginpahayag nga agud mahibaluan kun lehitimo nga ID ang ginahawiran sang isa ka residente sang siudad, dapat makit-an nga may ara gid ini sang security label.
Kabahin man sa mahimo nga beripikasyon amo ang paglantaw sa PWD registry website sang Department of Health kun sa diin makit-an ang mga pangalan sang mga indibidwal nga makabig persons with disability.
