Kanselado ang natalana nga public hearing angut sa ginaduso nga construction sang isa ka coffee shop sa sulod sang kumbento sa Santa Barbara Parish Church kasunod sang request sang mga opisyal sang simbahan.
Gin-anunsyo mismo ni Mayor Dennis Superficial ang kanselasyon matapos mabaton ang mga sulat halin kay Parish Priest Msgr. Sinforoso S. Padilla Jr. kag sa Parish Pastoral Council nga nagahingyo nga ipaiway anay sang local government ang konsultasyon.
Sa interview sang Bombo Radyo kay Vice Mayor Ramon Sullano, iya ginpahayag nga luyag sang mga opisyal sang simbahan nga magkonsulta anay sa ila mga abogado tuhoy sa proposal kasunod sang pagsinapol kaupod si Jaro Archbishop Most Rev. Midyphil Billones.
Suno kay Sullano, nahibaluan lang sang local government ang amo nga proposal sang nakapangayo na sang permiso ang Parokya sa National Historical Commission of the Philippines (NHCP).
Pahayag sang bise alkalde, ang proposed coffee shop ang maga-okupar sang porsyon sang kumbento, lakip na sa idalom nga bahin.
Matandaan nga sa sulat nga napetsahan Setyembre 1, 2026, ginpahayag sang NHCP nga wala sila sang objection sa proposed development, sandig sa score of work kag working drawings nga ginpasa sang consultant sang simbahan.
Nahibaluan nga ang Santa Barbara Church kag ang Kumbento ang ginakabig nga National Historical Landmark.
Gingamit man sadto ang simbahan bilang headquarters sang revolutionary forces ni General Martin Delgado sang 1898.
Dugang pa nga ginasiguro ni Vice Mayor Sullano ang publiko nga magapatigayon sang publilc consultation ang local government agud mapamatian ang sentimyento sang mga residente tuhoy sa ginaduso nga pagbutang sang coffee shop sa kumbento.
Sa subong, wala pa sang bag-o nga petsa para sa nasambit nga public consultation.
