Wala sang dapat kabalak-an ang mga pumuluyo sa probinsya sang Iloilo sa supply sang baboy subong nga ‘ber’ months ilabi na nga nagahilapit ang paskwa suno sa Iloilo Provincial Veterinary Office.
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga ginabulubanta yara sa 87% sang supply sang baboy sa probinsya ang nagahalin sa mga lokal nga hog raisers, samtang may yara man sang supply nga ginadugang halin sa Antique, Negros Occidental kag Guimaras.
Suno kay Dr. Tabuada, apisar nga ginapaabot nga magataas ang demand sa karne sang baboy samtang nagahilapit ang mga nagkalain-lain nga selebrasyon subong nga ‘ber’ months, may yara sang bastante nga supply agud ma-cater ang kinahanglanon sang merkado.
Pahayag pa niya, naka-recover na ang pila ka hog industry sa Iloilo batuk sa epekto sang African Swine Fever (ASF), kag ginalauman nga wala na sang kaso pa ang magluntad agud indi maapektuhan ang industriya sang baboy sa probinsya.
Ginpahayag man niya nga base sa monitoring sang Provincial Veterinary Office, nagalab-ot sa ₱220 tubtob ₱340 kada kilo ang presyo sang karne sang baboy sa lokal nga mga merkado, depende sa klase ukon cut sang karne.
Samtang, ang farmgate price naman ang yara sa ₱140 tubtob ₱170 kada kilo.
Pagpaathag ni Dr. Tabuada, importante ang pagpaayo sang monitoring sa pagbaligya sang baboy ilabi na sa mga lugar nga may yara sang mga kooperatiba sang hog raisers agud mas mapatuman ang pagdumala sa presyo.
Apang, gin-ako man niya nga mas mabudlay kontrolon ang presyo sang mga baboy nga ginabaligya sang mga pribado nga negosyo.
Bangud sini, ginpabutyag ni Dr. Tabuada ang importansya sang bulig sang Department of Trade and Industry (DTI) sa pag-monitor sang presyo sa merkado agud mabuligan nga mapabilin nga barato kag masarangan baklon sang mga konsumidor ang karne sang baboy.
