Kapin 8,000 ka senior citizen kag persons with disabilities (PWDs) nga may hypertension ukon diabetes ang makabaton sang libre nga maintenance medicines sa idalom sang MediSen+ Program sang Iloilo City Government.
Ginsuguran ang ceremonial distribution subong nga adlaw, Oktubre 29, nga ginpangunahan ni Mayor Raisa Treñas.
Suno kay Iloilo City Mayor Raisa, direkta na nga ipanagtag sa tagsa ka barangay ang mga bulong agud indi na kinahanglan magbyahe pakadto sa City Hall ang mga benepisyaryo, ilabi na ang mga senior citizen kag PWDs nga may kabudlayan sa paglakat.
Nahibaluan nga nagpain ang Iloilo City Government sang P20 milyon nga pondo para sa programa agud mabuligan ang mga benepisyaryo sa ila regular nga pag-inom sang maintenance medicines.
Lakip sa libre nga maintenance medicines ang:
📍Losartan 50mg kag 100mg
📍Valsartan 80mg
📍Rosuvastatin 20mg
📍Trimetazidine 35mg
📍Atorvastatin 20mg kag 40mg
📍Telmisartan 40mg kag 80mg
📍Telmisartan + HCTZ 40mg + 12.5mg
📍Amlodipine 10mg
📍Metformin 500mg
📍Gliclazide 30mg
📍Omeprazole 20mg kag 40mg
Samtang, sa una nga semana sang Nobyembre, pagasundan naman ini sang distribusyon sa iban pa nga distrito sang siyudad.
𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
