Nagpanawagan ang Iloilo Provincial Hospital Management Office (HMO) sa publiko nga likawan ang pagpalapta sang unverified nga mga impormasyon sa social media may kaangtanan sa mga reklamo batok sa mga ospital sa probinsya.
Ini ang kasunod sang mga reklamo sang mga pasyente nga ginapahayag may yara sang kapaltahan kag kapabayaan ang pila ka mga hospital sa probinsya sang Iloilo.
Sa interview sang Bombo Radyo kay Atty. Yoko Marie Eguia, head sang HMO, iya ginpahayag nga ang mga unverified information ang mahimo magbutang sa peligro sa seguridad sang mga health workers ilabi na nga may yara sang mga post na nga naga-alegar sang mga pagpamahog batok sa mga hospital staff kag doktor.
Suno kay Atty. Eguia, mas importante nga maprotektahan ang seguridad sang mga health workers ilabi na subong nga madamo ang pasyente sa mga ospital sa probinsya.
Pahayag pa niya, repasuhon sang ila opisina ang mga hospital protocols agud masiguro ang pagsunod sang mga personnel sa quality standards of care kag mahibaluan kon may mga kakulangan sa implementasyon ukon komunikasyon sa tunga sang medical staff kag mga pasyente.
Ginalantaw man sang opisina ang pag-standardize sang pagresponde sang mga ospital sa mga reklamo kag adverse events agud mangin mas pareho ang pagpatuman sang mga proseso kag mas mapauswag ang sistema sang pag-atipan sa mga pasyente.
Ginpahayag man ni Atty. Eguia nga nagapadayon man ang pagpaayo sang mga pasilidad kag pagdugang sang mga kagamitan kag personnel sang mga provincial hospital, paagi sa mga programa kag investment sang Iloilo Provincial Government kag Department of Health.
Dugang pa niya nga padayon ang pagrepaso kag pagpaayo sang mga proseso kag serbisyo sang mga ospital sa probinsya agud masiguro nga mahatagan sang nagakaigo nga pag-atipan ang mga pasyente.
