Nagpanawagan si President Ferdinand “Bongbong” Marcos Jr. sa mga Pilipino nga magbulig sa pagbantay sa ginaduso nga P7.2 trillion nga national budget para sa tuig 2027 agud masiguro nga indi ini magdiretso sa bulsa sang mga kurap nga mga pulitiko.
Suno kay Palace Press Officer Usec. Claire Castro, ini ang mando sang Presidente agud malikawan ang pag-gamit sang pondo sa mga ghost projects ukon mga proyekto nga wala man ginpatuman, kag sa mga imprastraktura nga nagagamit sang mga materyales nga substandard ukon indi dekalidad.
Dugang pa ni Castro, responsibilidad sang tanan nga mga pumuluyo ang pagbantay sa paggamit sang kwarta sang gobyerno.
Ginpanawagan man niya sa publiko nga ibuyagyag kun may makit-an nga mga anomaliya sa mga proyekto sang Department of Public Works and Highways (DPWH).
“‘Yan po ang dapat natin bantayan. Obligasyon po nating lahat,” suno kay Castro.
“Ang nais ng Pangulo, ang utos ng Pangulo, hindi mapunta ang budget, ang pera ng bayan sa ghost projects, sa mga proyektong merong ginamit na substandard materials. Lahat po tayo magtutulong-tulong para bantayan po ito. ‘Yan ang utos ng Pangulo,” dugang sini.
Una na nga ginpahayag sang Malacañang nga mangin problema lamang ang pagpasulod sang dugang nga pondo ukon budget insertions sa national budget kun ini ang nagakadto sa bulsa sang mga pulitiko.
Ini matapos ginpahayag sang People’s Budget Coalition (PBC) nga ang may pinakadaku nga budget insertions para sa public works projects amo ang first engineering district sang Ilocos Norte nga nagabalor sang P4.37 bilion.
Ini nga distrito amo ang ginarepresentar ni House Majority Leader Sandro Marcos nga subang nga bata sang Presidente.
Sa hearing sang Senate Finance Committee, nagpaandam man ang PBC nga may masobra P1-trillion nga balor sang “red flags” sa ginaproponer nga 2027 national budget lakip na ang nagkalain-lain nga discretionary funds ukon kilala man nga “pork”.
“Lampas P1 trilyong red flags ang nakita namin sa 2027 budget—P210 billion sa soft pork sa anyo ng patronage-driven ayuda, P695 billion sa hard pork, which is politicized infrastructure, and P112 billion po sa shadow pork o ‘yung unprogrammed appropriations,” suno kay PBC co-convenor AJ Montesa.
Una naman nga nagdepensa ang mga lider sa House of Representatives sa amendments sa bersyon sang Kamara sa budget, nga suno sa ila, nakabase sa mga panugyan sang nagkalain-lain nga ahensiya sang gobyerno kag ginhimo nga may yara sang klaro nga rason.#
