Ginkumpirma sang Mines and Geosciences Bureau (MGB) nga gin-utod ang kapin 12,000 ka kahoy, lakip na ang magagmay nga kahoy, sa preparasyon sang lugar para sa operasyon sang nickel mining sa banwa sang Dinapigue, Isabela.
Suno kay MGB Regional Director Mario Ancheta, kaupod sa mga gin-utod nga kahoy ang yara sa sulod sang 15-hectare nga lugar nga may permiso para sa pagmina kag pag-utod sang mga kahoy.
Makita man sa mga satellite image ang malapad nga bahin sang duta nga wala na sang mga kahoy sa tunga sang madamol nga kagulangan sa Sierra Madre mountain range.
Ginklaro sang MGB nga may yara sang nagakaigo nga mga permiso ang kompanya para sa ila operasyon.
Apang, ang lugar sang pagmina yara sa guwa sang Northern Sierra Madre Natural Park kag sang buffer zone sini, nga may kalayuon nga 1.1 kilometro halin sa protected area.
Suno sa regulasyon sang gobyerno, kinahanglan magtanom ang mga kompanya sang 100 ka kahoy sa kada isa ka kahoy nga ila gin-utod kag magpatuman sang mga programa para sa pagpabalik sang kagulangan.
Apang, nagapabilin ang mga kabalaka sa mahimo nga epekto sang pagkakalbo sang kagulangan sa biodiversity, mga watershed kag komunidad nga nagaistar sa palibot sini.
