Nagapanawagan ang mga sapultorero sang Tanza Public Cemetery sa mga nagabisita sa nasambit nga patyo nga magdala sang kaugalingon nga sako ukon bag agud may masudlan sang ila mga basura.
Sa interview sang Bombo Radyo kay alyas Nonoy, isa ka sepultorero, iya ginpahayag nga bangud madamo na ang nagabisita, nagadamo man ang basura nga nagabilin sa nasambit nga patyo.
Ginapangabay man niya nga ibutang lamang ini sa ginatalana nga lugar agud mahapos nga makolekta.
Suno kay alyas Nonoy, nagbutang na sila sang mga basurahan sa nagkalain-lain nga bahin sang sementeryo agud malikawan ang paglapta sang mga basura.
Ginapasiguro man nila nga matinlo ang palibot sang Tanza Public Cemetery, gane ginapaabot man nila nga ipatuman man ini sang publiko nga nagabisita sa ila nagtaliwan nga himata.
