Gindala sa ospital ang 11 ka mga sakay sang depampasahero nga jeep matapos naaksidente sa Barangay Tupol Este, Cabatuan, Iloilo pasado ala una subong nga hapon, Oktubre 30.
Sa interview sang Bombo Radyo kay Police Captain Mary Dhen Gerbolinga, officer in charge sang Cabatuan Municipal Police Station, iya ginpahayag nga natabo ang aksidente matapos nadulaan sang control ang driver sang jeep.
Dugang ni Gerbolinga, naga-byahe ang jeep halin sa Poblacion pakadto Tupol Este.
Sa pulo ka estudyante nga sakay sini, walo ang nakaangkon sang minor injuries, isa ang may fracture, kag isa ang may head injury.
Gin-refer sa ospital sa syudad ang estudyante nga may head injury kag ang iban ang yara naman subong sa ospital sa Cabatuan.
Magluwas sa mga pasahero sang jeep, na-fracture man ang driver sang isa ka motorsiklo nga nasagaid sang jeep sang natabo ang aksidente kag padayon man subong nga gina-bulong sa ospital.
Ginpahayag ni Gerbolinga nga lunsay menor de edad ang mga pasahero sang jeep kag gina verify pa sa subong kun sa diin ini sila nga mga eskwelahan.
Sa subong, yara sa kustodiya sang kapulisan si alyas Ricky, 53 anyos, nga amo ang driver sang jeep kag ginapaidalom man sa medical examination.
Pahayag sang Cabatuan police, napahibalo na sa mga pamilya sang mga estudyante ang natabo.# (via Bombo Ireca Faye Pioquinto)
