Padayon nga ginapangita sang Philippine National Police (PNP) ang pugante nga Senador nga si Ronald “Bato” Dela Rosa apisar nga natapos na ang ginhatag nga ultimatum sa iya subong nga adlaw, Oktubre 30.
Madumduman nga nagpagwa sang statement si Department of the Interior and Local Government (DILG) Secretary Jonvic Remulla sang nagligad nga semana kun sa diin ginpatungan sa ulo ang nasambit nga senador sa kantidad nga P50 million.
Suno kay PNP Information Office Chief Col. Allen Rae Co, ang pagsungka amo ang insakto nga himuon ni Dela Rosa agud mapabilin ang dignidad sini.
Ginpaathag man ni Co sa publiko nga ang P50 milyon nga padya ang para sa mga tawo nga makahatag sang impormasyon sang lokasyon ni Bato, apang wala ginatugutan ang mga sibilyan nga personal nga arestuhon ang senador.
Ginhatagan man paathag sang PNP ang pahayag nila nga armed and dangerous ang senador bangud nagapanag-iya ini sang masobra 90 ka armas kun sa diin wala pa naubos ang pagrekober sang mga otoridad tubtob subong.
Sa subong, ginatun-an na ang pag-release sang mga wanted nga poster sang senador.
Nahibaluan nga nagpangtapik na sang posters ni Bato ang mga miyembro sang Akbayan Youth sa Kalayaan Avenue sa Quezon City kun sa diin nakasulat ang “WANTED for crimes against humanity, Bato Dela Rosa surrender to the ICC now!”
