Luyag sang Truth Commission nga ma-imbestigaran ang lima ka mga doktor nga nagpirma sang drug war death certificates matapos ang ginapahayag nga inconsistencies nga nakit-an.
Suno sa komisyon, nakaagum ang mga biktima sang gunshot wounds sa ulo kag lawas, apang nakalista sa death certificate sang mga ini nga sila nagtaliwan sa mga nagkalain-lain nga sakit kaangay sang pneumonia, heart attack, kag sepsis.
Dugang pa sang komisyon, magasulat ini sa Professional Regulation Commission (PRC) kag Philippine Medical Association (PMA) para mausisa ang lima ka doktor nga nagpirma sang mga certificate.
Nahibaluan nga may ara sang 13 ka kaso sang death certificate nga ginaalager indi matuod ang impormasyon, matapos nga ginkutkot kag gin-analisar ni Dr. Raquel Fortun ang mga kalawasan sang biktima.
Suno naman sa PRC, nakalab-ot na sa ila nga atensyon ang panawagan sang Truth Commission.
Ila nga gin-cite ang “Professional Modernization Act of 2000” kun sa diin ginatugutan ang Professional Regulatory Boards nga mag-imbestigar sang mga kaso nga may alleged violations sang professionals.
Mahimo man mapasa sang Truth Commission ang certificates kag iban pa nga mga dokumento sa PRC.
“The Commission, through the Professional Regulatory Board of Medicine, shall evaluate the available evidence to determine the appropriate action and assess whether sufficient grounds exist to proceed with the conduct of a motu proprio investigation,” suno sa PRC.
Dugang pa sini: “If it is established by substantial evidence that the concerned doctors committed violations of the Professional Regulatory Law, the Code of Ethics of the Medical Profession, or other applicable laws, rules, and regulations, the Professional Regulatory Board of Medicine may impose the penalty of suspension or revocation of their certificates of registration to practice medicine in accordance with law.”
Madumduman nga may ara sang masobra 6,000 ka mga indibidwal ang napatay bangud sa war on drugs sang anay presidente Rodrigo Duterte, apang sandig sa human rights groups, nagalapaw ang casualties sa 30,000.
Yara subong si Duterte sa detention facility sang International Criminal Court (ICC) sa The Hague, Netherlands kag nagahulat sa trial sa kaso nga crimes against humanity bangud sa amo nga drug war.
