Arestado ang 45-anyos nga kabulig sa balay kaangot sa ginapahayag nga insidente sang pagpangawat sang alahas, malahalon nga mga relo, kag foreign currencies nga nagabalor P2 milyon halin sa isa ka residente sang Barangay Pasong Tamo, Quezon City.
Base sa imbestigasyon sang Holy Spirit Police Station (PS 14), sang nag-abot ang biktima sa iya balay, nagpanugid ang kabulig nga may nabaton siya nga tawag nga nagapangayo sang bulig.
Ginpahayag sang kabulig nga ginsugiran siya sang tawo nga nagtawag sa telepono nga naaksidente ang iya amo.
Suno sa kabulig, ginsugo siya sang tawo nga nagtawag nga tipunon ang mga malahalon nga gamit agud ibayad sa ginpahayag nga aksidente.
Natukiban sa imbestigasyon nga naguba ang padlock sang cabinet kag cash box sa kwarto sang amo, kag nagagwa nga ginpwersa ang pagbukas sini.
Sang ginpamangkot sang tag-iya ang iya kabulig, gilayon nga nag-ako ini nga ginhatag niya ang mga gamit sa tawo nga nakaistorya niya sa telepono.
Nalakip sa mga napalagyo nga kwarta kag kagamitan nga nagabalor P2,007,000 amo ang €400, £1,000, Rolex watch, isa ka Philip Stein, Oris watch, pendant nga may unod nga abo, kag iban pa nga malahalon nga gamit.
Base sa Quezon City Police District (QCPD), magapangatubang ang suspek sang kaso nga paglapas sa Article 310 of the Revised Penal Code ukon qualified theft.
