Indi lamang isa ka pangabuhian kundi kalipay man para sa isa ka manug-panglimpyo sang lapida sa patyo ang pagserbisyo sa mga pamilya nga nagabisita kag naga-atipan sang lulubngan sang ila mga hinigugma nga napatay.
Sa interview sang Bombo Radyo kay Mark Anthony Carpo, isa ka manugsumbra sa Forest Lake sa distrito sang Mandurriao, iya ginpahayag nga iya ginakalipay kun makita niya nga kontento kag masadya ang mga pamilya sa resulta sang iya pagpanglimpyo, bangud paagi sa iya obra, mabuligan niya nga mapabilin nga matinlo kag matahum ang lapida sang ila mga minatay.
Suno sa iya, may lima na ka tuig siya nga naga-sideline sa amo nga obra kag bisan may iban pa siya nga pangabuhian, padayon niya ini nga ginahimo bangud nalipay siya nga makaserbisyo sa mga pamilya, lakip na sa iya mga abyan kag kakilala nga nagapalimpyo man sang lapida sang ila mga minatay.
Pahayag niya, nagsugod siya sang pagpanglimpyo sang Oktubre 31 tubtob subong nga mga tinion ilabi na nga nagadamo ang mga kustomer samtang nagapalapit ang pista minatay.
Ginpahayag man ni Carpo nga nagadepende sa klase kag kondisyon sang lapida ang bayad sa serbisyo kun sa diin nagasugod sa P150 tubtob P250 kag mahimo pa nga magtaas suno sa kahimtangan sang lapida.
Dugang pa niya, sang nagligad nga tuig naka-income siya sang kapin P3,000 sa sulod sang tatlo ka adlaw nga pagpanglimpyo sang mga lapida.
Nahibaluan nga may yara sang nagkalain-lain nga aktibidad nga pagahiwaton sa Forest Lake bwas nga adlaw, Nobyembre 1 pareho sang misa alas-nwebu sa aga kag alas-dos sa hapon, may yara man sang mga activities pareho sang yearly park parade, native Christmas cosplay, film showing kag iban pa bilang kabahin sang pagsaulog sang pista minatay sang nasambit nga patyo.
