Pagalimitahan sang League of Municipalities of the Philippines (LMP) Guimaras Chapter ang pagpatigayon sang bayle sa probinsya sang Guimaras kasunod sang mga reklamo nga nabaton kag mga ginagamo sa mga kabarangayan.
Sa interview sang Bombo Radyo kay Jordan, Guinaras Mayor John Edward Gando, nga amo man ang presidente sang LMP-Guimaras Chapter, iya ginpahayag nga may mga barangay sa probinsya nga may yara sang madamo nga sitio, kag ang tagsa ka sitio ang nagapatigayon sang ila kaugalingon nga kapisahan kag baylihanay.
Bangud sini may mga reklamo na nga nabaton ang mga opisyal sang barangay halin sa mga residente, lakip na ang mga senior citizen, bangud sang kagahod halin sa mga sound system nga ginagamit sa nasambit nga aktibidad.
Suno kay Gando, ila man ginkonsulta ang mga presidente sang kada sitio sa paghimo sang resolusyon, kag may mga nagasuporta man sa plano bangod sa rason nga ang mga barangay officials man ang mismo nga nagagasto sa sound system kag nagabantay sa kahiwatan agud malikawan ang posible nga kinagamo.
Apang, ginpaathag niya nga may mga aktibidad sa barangay, pareho sang coronation kag iban pa nga programa nga mahimo gihapon sundan sang baylihanay pagkatapos sang opisyal nga programa.
Pahayag pa sang alklade, may yara naman sang resolusyon nga ginpasa ang LMP-Guimaras Chapter kag ginaplano man ang paghimo sang executive order sa tagsa ka banwa sa probinsya agud mapatuman ang nasambit nga limitasyon.
Pagpaathag niya, indi pagatugutan ang baylihanay sa mga sitio, samtang ang kada barangay ang hatagan lamang sang duha ka kahigayunan sa isa ka tuig nga magpatigayon sini.
Dugang pa, ginapaabot nga mangin epektibo ang bag-o nga patakaran sa Enero 1, 2027.
