Nagsugod lang sa intensyon nga mabuligan ang iya classmates nga makakuha sang “plus points” sa isa ka subject ang first year student nga si Heineken Joyce O. Sajorne sang West Visayas State University sa idalom sang kurso nga Computer Science sang nagkuha ini sang University Statistics Quiz.
Apang subong, sya na ang magatiglawas sa Western Visayas sa 30th Philippine Statistics Quiz- National Finals nga patigayunon sa Nobyembre 6 sa PSA headquarters.
Isa ini ka pasinawan nga nagalantaw sang ikasarang sang Filipino college freshmen sa statistics kag ang abilidad sang mga ini sa pag-analisar sang data kag pagsolbar sang statistical problems.
Sa interview sang Bombo Radyo kay Sajorne, iya ginpahayag nga sang nakalab-ot na sya sa provincial level didto pa lang siya mas nangin dedikado agud makapadayun sa national level kag mangin representante sang rehiyon.
Apang suno sa iya, indi na sya bag-o sa kumpetisyon ilabi na nga sang elementarya pa lang, nagapartisipar na sya sa nagkalain-lain nga aktibdad sa Singapore kag Japan.
Ginpakigbahin man sini nga dako gid nga bulig sa iya ang suporta sang mga tawo nga yara sa iya palibot lakip na ang iya nga mga coach nagikan sa College of Arts and Science sang WVSU.
Nahibaluan nga si Sajorne man ang labing una nga estudyante sang WVSU nga nakalab-ot sa National Finalist sang nasambit nga Philippine Statistics Quiz.
Suno sa iya, sa masobra lima na ka tuig, masami gid nga lalaki ang makasulod sa top 5 sang kumpetisyon, apang subong, luyag niya nga mapamatud-an ang ikasarang sang isa ka babayi sa nasambit nga pasinawan.
