Nagpasalig si National Bureau of Investigation (NBI) Director Atty. Melvin Matibag nga paga-imbestigaran sang ahensya ang reklamo batok sa Ahjay Paws Aftercare Pet Crematorium matapos ang insidente sang paghaboy sang 29 ka patay nga hinuptanan sa isa ka bakante nga lote sa San Jose del Monte, Bulacan.
Ang nasambit nga 29 ka hinuptanan ang ginalakipan sang 26 ka ido kag tatlo ka kuring nga iga-cremate kuntani apang ginhaboy lamang ang ini.
Suno kay Atty. Matibag, usisaon sang NBI ang operasyon sang nasambit nga pasilidad, lakip ang business permits, equipment, CCTV footage kag mga dokumento agud mahibaluan kun may kaangtanan ang narekober nga mga patay nga hinuptanan, amo ang mga alaga sang pet owners nga ginsalig sa crematorium.
Ginapanawagan man niya ang mga apektado nga pet owner nga magsumiter sang ila mga resibo, cremation certificates kag iban pa nga dokumento nga makabulig sa pagtipon sang ebidensya.
Makipag-angot man ang NBI sa Department of the Interior and Local Government (DILG), Department of Environment and Natural Resources (DENR), Philippine National Police (PNP) kag mga lokal nga panguluhan para sa pag-inspeksyon sang kaangay nga mga pasilidad kasunod sa rekomendasyon sang Philippine Animal Welfare Society.
Ginkondena man ni Matibag ang natabo nga insidente kag ginpunto nga indi ini lamang kapalpakan sa serbisyo kundi isa ka seryoso nga paglapas sa pagsalig nga ginhatag sang mga pet owner.
