Ginpahanumdom ni International Criminal Court (ICC) Trial Chamber III Presiding Judge Joanna Korner ang kampo sang depensa ni anay Presidente Rodrigo Duterte nga kinahanglan ini nga magtambong sang personal sa korte kada adlaw sa pagsugod sang iya trial sa Nobyembre 30.
Suno kay Korner, may gahum ang korte nga maghatag sang temporaryo nga pagtugot sa indi pagtambong sa tion sang preliminary proceedings, apang ginapatuman sang international law ang presensya sang akusado sa aktuwal nga trial sang kaso.
Ginpahayag sang chamber nga ginapaabot sang korte ang adlaw-adlaw nga pagtambong ni Duterte magluwas na lamang kon may espesyal nga kahimtangan nga gin-aprubahan sang korte.
“Once the actual trial starts, we will expect attendance on a daily basis,” suno kay Judge Korner.
Ginapangatubang ni Duterte ang kaso nga crimes against humanity may kaangtanan sa kontrobersyal kag maduguon nga kampanya kontra sa iligal nga droga sa tion sang iya administrasyon.
Suno sa Article 63(1) sang Rome Statute, kinahanglan nga mag-atubang ang akusado sa trial, apang mahimo man ikonsiderar sang korte ang mga pangabay nga magtambong paagi sa video link ukon temporaryo nga indi pagtambong sa tumalagsahon nga mga kahimtangan.
Matandaan nga nagtambong si Duterte sa ikatatlo kag ikaapat nga conference sang kaso.
