Nagpagwa si President Ferdinand Marcos Jr. sang Executive Order No. 130 nga nagapatuman sang bag-o nga mga patakaran sa pagsuspende kag pagbalik sang klase kag onsite work sa mga pampubliko kag pribado nga eskwelahan.
Sa sini nga order, gin-introduce ang tatlo ka mga mekanismo nga amo ang automatic suspensions sandig sa official hazard warnings kag technical thresholds, localized suspensions nga gindeklarar sang local chief executives, kag ang school-level suspensions sandig sa documented safety assessments.
Sa bag-o nga pagsulundan, mahimo nga ipatuman ang class suspensions sang awtomatiko nga wala sang separado nga announcement halin sa local officials pananglitan malab-ot na sang hazard warnings ang thresholds nga amo ang iga-establisar sa implementing guidelines.
Samtang, sa amo nga order, mahimo man nga magpangabay ang mga eskwelahan nga ibalik ang face-to-face classes bisan may yara pa sang nagapadayon nga suspensyon sa ila lugar.
Apang kinahanglan anay nga ipaidalom sa safety assessment ang nasambit nga eskwelahan kag kinahanglan ang pagtugot sang apektado nga local chief executive.
Gin-amyendahan man sang EO 130 ang Executive Order No. 66, Series of 2012, nga amo ang nagadumala sang suspensyon sang klase kag trabaho sa mga opisina sang gobyerno kun may kalamidad kag malain nga kahimtangan sang panahon.
“The suspension of in-person classes shall not automatically suspend learning. Educational institutions and learning centers shall, whenever feasible and appropriate, implement learning continuity,” suno pa sa amo nga Executive Order.
Ginhatagan ang Department of Education (DepEd) sang 30 ka adlaw agud nga magpagwa sang implementing guidelines kasunod sang mandu halin sa Malacañang.
