Ginpasiguro sang Iloilo Science and Technology University (ISAT-U) nga ginaprotektahan ang ikaayong-lawas sang mga estudyante kag personnel sa tunga sang tuman ka init nga tyempo.
Ini bangud nagatupa na ang heat index sa Iloilo City sa danger category kun sa diin posible ma-eksperyensyahan ang heat cramps kag ang pagpalangapoy ukon heat exhaustion; kag kun magpadugay naman sa pagbulad sa init, posible ini nga magresulta sa heat stroke.
Sa interview sang Bombo Radyo kay Dr. Gabriel Salistre, President sang ISAT-U, iya ginpahayag nga kun makit-an sa forecast nga mataas ang heat index, naga-shift ang unibersidad sa online learning modalities nga synchronous ukon asynchronous para sa lecture classes sa college level kag sa Junior High School.
Ini nga lihok ang ginpatuman halin subong nga Martes, Nobyembre 3, tubtub sa bwas, Nobyembre 4 kag sa Nobyembre 5.
Magapadayon naman ang laboratory classes sa face-to-face nga operasyon, bangud suno kay Dr. Salistre, may yara sang air-conditioned facilities kag gamay lamang ang mga estudyante para sa sini nga klase.
Pahayag sini, wala man sang nakit-an nga disbentaha bangud na-implementar na ini sang pila ka mga tion kaangay sang coronavirus pandemic kag sa tion nga sobra ka init ang tyempo.
Nagpanawagan man si Dr. Salistre sa mga estudyante nga indi pag-abusuhan ang online classes, kag siguruhon nga mag-comply kag mangin responsable sa gihapon.
“Ang bottom line is the safety of our students,” suno kay Dr. Salistre. “I hope nga indi nila pag-i-abuse ang aton nga pag-shift to online kay basi mahambal sila nga wala sila diri sa campus, but if possible, just stay sa inyo respective boardinghouses, sa inyo panimalay. Facilitate kun ano ang kinahanglanon sa classroom nga gin-assign sang inyo teachers.”
Sandig sa two-day forecast sang state weather bureau, 42°C (Danger Category) ang heat index bwas kag 41°C (Extreme Caution) naman sa Huwebes.#
