Ginaduso nga pagabuksan para sa mga turista kag mangin isa ka tourist spot ang Iloilo Golf Course sa banwa sang Santa Barbara.
Ang ini nga golf course ginakabig bilang pinakadugay na nga golf course sa Pilipinas kag sa Southeast Asia kun sa diin nalakip man ini sa banwa nga ginatawag “A Town of Heritage.”
Sa interview sang Bombo Radyo kay Crisanta Marlene Rodriguez, direktor sang Department of Tourism 6, luyag nila ini nga buksan sa publiko para makig-angot man sa iban nga mga existing golf facilities.
Pahayag man ni Rodriguez nga gina-promote nila ang katahum sang palibot, ang meeting venues, bastante sa cultural heritage, gastronomy, kag leisure attractions.
Ginpabutyag man sang DOT 6 spokesperson nga makabulig man ini agud magbukas sang oportunidad para sa negosyo.
Dugang pa ni Rodriguez, bangud diri, ma-engganyo ang mga bisita para mag-extend sang ila bakasyon kag masuportaran ang local tourism enterprises.
Ang ini nga perspektibo sang DOT 6 indi lang sa lugar sang Iloilo kundi pati man sa bug-os nga rehiyon.
Nahibaluan nga may pagahiwaton nga 24th Bamboo Tee Golf Tournament sa amo man nga golf course kun sa diin may yara sang 350 ka golfers ang magatambong umpisa Nobyembre 12 tubtob 15.
