Nagpangabay ang Office of Senior Citizens Affairs (OSCA) nga maghalong gid ang mga katigulangan sa syudad sang Iloilo ilabi na nga masami na ma-eksperyensyahan ang tuman ka taas nga heat index bangud sa El Niño.
Sa interview sang Bombo Radyo kay Eleanor Gregorio, head sang amo nga opisina, iya ginpahanumdom sa mga senior citizen nga kun indi gid tuman ka importante ang pagguwa, pasulabihon nga magtinir sa panimalay kag damuon ang pag-inom sang tubig.
Nahibaluan nga nagapabilin sa 42°C ang heat index bwas kag sa Byernes sa syudad sang Iloilo.
Sandig sa Philippine Atmospheric, Geophysical and Astronomical Services Administration (PAGASA), ang 42°C nagatupa na sa danger range, kun sa diin posible ma-eksperyensyahan ang heat cramps kag ang pagpalangapoy ukon heat exhaustion; kag kun magpadugay naman sa pagbulad sa init, posible nga magresulta sa heat stroke.
Una na nga ginpahayag sang state weather bureau nga posible mag-peak ang Super El Niño sa Disyembre, kag posible maglawig ang epekto sini tubtub sa una nga bahin sang 2027.
