Dapat nga ibasura sang Korte Suprema ang petition nga ginpasaka nanday Robin Padilla kag Senador Bong Go batok sa desisyon sang Senate Impeachment Court kaangot sa voting threshold agud ma-convict si Vice President Sara Duterte.
Ini ang pagpati ni Rep. Terry Ridon nga isa man ka abogado kag myembro sang House prosecution panel.
Matandaan nga sa petition for certiorari and prohibition nga gin-file sadtong Oktubre, naghingyo sanday Padilla, Go, kag ang Partido Demokratiko Pilipino-Lakas ng Bayan (PDP-Laban) nga mag-isyu ang Korte Suprema sang status quo ante order ukon temporary restraining order.
Ini agud nga manduan ang Impeachment court kag ang Kamara nga indi pag-i-exclude ang sin-o man nga senador sa pag-isip sa mga tinaga nga “all members of the Senate” sa idalom sang Constitution.
Ang amo nga petisyon ang kasunod sang desisyon sang impeachment court nga i-base ang “two-thirds of votes” sa numero sang mga senador nga capable ukon may ikasarang sa pagpartisipar sa impeachment proceedings.
Suno naman kay Ridon sa interview sang Bombo Radyo Iloilo, wala man sang TRO subong gani nga padayon ang impeachment trial.
Dugang sini, amo sa gihapon ang ila posisyon nga premature ini nga petisyon bangud wala pa man sang botohay nga nagakatabo.
Matandaan nga nauna naman nga gin-dismiss sang Korte Suprema ang tatlo ka kaangay nga mga petisyon bangud sa procedural grounds lakip na ang kakulang sa legal standing kag nakit-an man nga premature.#
