Ginklaro ni Iloilo City Councilor Sheen Marie Mabilog nga naga-diet siya kag wala niya ginakabig nga daku nga isyu kung sa diin ginpabawi ang tinapay nga ginpanagtag sa mga konsehal sang Iloilo City Council sa tion sang session kahapon, Nobyembre 4.
Sa interview sang Bombo Radyo kay Mabilog, iya ginpahayag nga indi na bag-o sa iya nga wala siya nakabaton sang pamahaw kada Miyerkules nga session day, gani wala na lamang niya ini ginpasapak.
Apang, iya nanotisyaran nga may isa ka lalaki nga personnel sang Sangguniang Panlungsod nga daw nagduhaduha kung dapat pa bawi-on ang tinapay matapos nag-istoryahanay sila sang babaye nga staff nahanungod sa pagkuha sini.
Gin-athag man ni Mabilog nga wala sila sang official assignment kung sin-o ang magahatag sang pamahaw kada session, kag wala man siya sang ideya kung sin-o ang nagapadumala sini tungod nagafocus lamang siya sa pagpamati sa session.
Sa pagpangusisa man sang Bombo Radyo, ginapahayag nga si Liga ng mga Barangay President Irene Ong ang na-assign nga mag-provide sang pamahaw kahapon.
Suno sa iya naobserbahan, siya kag si Iloilo City Vice Mayor Lady Julie Grace “Love-Love” Baronda lamang ang wala permi nalakip sa paghatag sang pamahaw, samtang ang iban nga konsehal ang nakabaton sini.
Samtang, may isa ka concerned citizen nga nagpabutyag nga dapat ang Vice Mayor mismo ang ma-provide sang snacks sa tion sang session apang ang mga councilor na lang mismo ang naga-provide sini gamit ang ila kaugalingon nga kwarta bangud wala nagahatag si Baronda sang pamahaw.
Apang suno kay Mabilog, wala siya sang impormasyon nga ang Vice Mayor mismo ang naga-arrange sang pamahaw para sa mga konsehal kada session day kag wala siya sang personal nga ihibalo kung paano ginapatuman ang sini nga arrangement.
Bisan pa nga wala niya ginakabig nga daku nga isyu ang natabo, nagapati siya nga mas maayo nga istoryahan ini sang mga katapo sang konseho agud malikawan ang indi maayo nga pagtan-aw sang publiko, ilabi na nga may mga pumoluyo nga nakakita sa insidente.
Para kay Mabilog, mas maayo nga maresolbar ang concern kag magpadayon na lamang ang konseho sa mas importante nga mga diskusyon kag responsibilidad para sa siyudad.
Text by: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
