Ginapanindugan ni Iloilo City Councilor Sheen Marie Mabilog nga wala siya sang nahimo nga ano man nga sala kaangot sa paggamit sang government-issued vehicle kag handa siya nga mag-atubang sa imbestigasyon.
Sa interview kay Mabilog, sulit-sulit sini nga ginpahayag nga nakasabat na siya sa madamo nga interviews kag nahibaluan sini sa iya kaugalingon nga wala siya sang sala.
Dugang sini, magasabat siya sa husto nga forum kag preparado siya nga mag-comply kag mag-presentar sang ginapangayo nga mga dokumento.
Lakip sa ginpasalig ni Mabilog nga sabton sa imbestigasyon amo ang isyu nga student permit ang lisensya sang driver sang gindala nga salakyan. Gina-insister man sini nga may yara siya sang trip ticket sang naglakat siya sang amo nga adlaw.
Kabahin man ini sang iya sabat matapos ang hangkat ni Joy Fantilaga-Gorzal, spokesperson ni Mayor Raisa Treñas, nga magpakita siya sang kinahanglanon nga dokumentasyon agud nga maathag na ang isyu sa publiko.
Kun balikan, Domingo sang nakit-an ang government vehicle sa gwa sang isa ka mall sa Molo, Iloilo City.
Una naman nga nag-ako si Mabilog nga naghulam siya sang amo nga salakyan sa idalom sang opisina ni Vice Mayor Lady Julie Grace Baronda agud nga magbakal sang school supplies para sa “Balik Eskwela Project”.
Nahibaluan nga magapatigayon sang investigation in aid of legislation ang Iloilo City Council may kaangtanan sa husto nga paggamit sang government-issued vehicles kun sa diin mangin kabahin ang Committee on Good Government, Public Accountability and Justice jaupod ang City Legal Office, Public Order and Safety Management Office (POSMO) kag iban pa nga concerned offices.#
