Nagahanda ang National Bureau of Investigation (NBI) nga pasakaan sang anom ka reklamo ang mga indibidwal nga illegal nga naghaboy sang mga bangkay sang mga sapat sa isa ka bakante nga lote sa San Jose del Monte, Bulacan.
Suno kay NBI Director Melvin Matibag, boluntaryo nga nag-atubang sa ahensya ang duha ka operator sang Pet HPHT Crematory kag gin-ako nga ginlubong na lamang nila ang bangkay sang mga patay nga kasaptan bangud sa madamo nga bangkay sang sapat ang ila nga nabaton.
Ginpahayag man sang mga ini nga ginapadala sa ila sang Bacoor City-based Ahjay Paws Aftercare Pet Crematorium ang mga bangkay agud sunugon, apisar sa kakulangan sang mga ini sang pasilidad kag kagamitan para sa cremation.
Bangud sini, indi abo sang mga nagapanag-iya sang kasapatan ang ginabalik sa mga tag-iya kundi abo na nga ginahanda sang nasambit nga pet crematorium.
Sa subong, nadiskobrehan na sang NBI ang tatlo ka lugar nga ginahabuyan sang mga bangkay kag ginahanda na ang mga reklamo sang 25 fur parents nga apektado sang insidente.
Maga-isyu man ang NBI sang Immigration Lookout Bulletin Orders batok sa mga nalakip agud masiguro nga maga-atubang ang mga ini sa mga rekalmo nga ginpasaka sa ila.
