Ginpabakod pa sang Korte Suprema ang constitutionality sang Republic Act 12326 nga nagapalawig sa termino sang mga opisyal sang barangay kag Sangguniang Kabataan (SK) sa lima ka tuig kag nagatalana sang masunod nga Barangay and Sangguniang Kabataan Elections (BSKE) sa Nobyembre 2028.
Sa desisyon nga ginsulat ni Chief Justice Rodil V. Zalameda, ginbalibaran sang Korte Suprema ang petisyon sang election lawyer nga si Atty. Romulo B. Macalintal nga nagakuwestiyon sa legalidad sang nasambit nga layi.
Sa idalom sang RA 12326, gin-extend sa lima ka tuig halin sa anay apat ka tuig ang termino sang mga opisyal sang barangay.
Ginlimitahan man sa duha ka sunod-sunod nga termino ang ila pagserbisyo halin sa anay tatlo ka termino.
Suno kay Macalintal, nagalapas ang layi sa substantive due process kag sa kinamatarong sang mga pumuluyo nga magboto.
Napaslawan man ang layi suno kay Macalintal nga malab-ot ang istrikto nga guidelines nga naplastar sa 2023 ruling nga Macalintal v. COMELEC nga naga-require sang “important, substantial, or compelling reasons” agud nga postpone ang piniliay.
Apang ginpaathag sang Korte Suprema nga indi mahimo nga ikumparar ang nasambit nga desisyon sa RA 12326 bangud ang bag-o nga layi naga-set sang kalawigon sang termino sang mga opisyal kag indi lamang nagapadugay sang eleksyon.
Dugang pa sang Korte, yara sa Kongreso ang gahum sa pag-fix sang kalawigon sang termino sang mga opisyal sang barangay kag SK. Ang pagbalhin sang masunod nga eleksyon sa Nobyembre 2028 kabahin lamang sang pagpatuman sang bag-o nga lima ka tuig nga termino.
Gin-athag man sang Korte nga indi awtomatiko nga mangin layi sa pagpalawig sang eleksyon ang isa ka layi nga naga-set sang termino sang mga opisyal bisan pa nga maapektuhan sini ang schedule sang eleksyon.
Ang mga nag-ugyon sa desisyon amo sanday anay Chief Justice Alexander G. Gesmundo nga nagretiro na kag ginbuslan ni Zalameda, kag Associate Justices Amy C. Lazaro-Javier, Henri Jean Paul B. Inting, Samuel H. Gaerlan, Jhosep Y. Lopez, Japar B. Dimaampao, Jose Midas P. Marquez, kag Raul B. Villanueva. Naka-leave naman si Associate Justice Maria Filomena D. Singh.
Samtang, wala nag-ugyon sa desisyon sanday Senior Associate Justice Marvic M.V.F. Leonen kag Associate Justices Alfredo Benjamin S. Caguioa, Ramon Paul L. Hernando, Ricardo R. Rosario, kag Antonio T. Kho Jr.#
