Ginpamatukan ni Iloilo City Traffic and Transportation Management Office (ICTTMO) Head Retired Colonel Uldarico Garbanzos nga indi matuod ang alegasyon nga ginpahulat sing halos 15 minutos ang mga motorista sa Balabago, Jaro, agud mapalabay ang ginapahayag duha ka VIP van sang Iloilo City Government.
Sa interview sang Bombo Radyo kay Garbanzos, ang paghulat sang mga motorista may kaangtanan sa traffic scheme kag road modernization project sa lugar, lakip ang manual traffic control kag pag-adjust sang timing sang traffic lights suno sa volume kag direksyon sang mga salakyan.
Gin-ako man niya nga may mga request nga gina-prayoridad para sa mga opisyal nga nagaserbisyo sa siyudad, apang ini ginahimo paagi sa koordinasyon sang traffic personnel kag opisina ni Mayor Raisa Treñas.
Gin-encourage man ni Garbanzos ang publiko nga magpadayon sa paghatag sang reklamo kag suhestyon, basta ang mga alegasyon mag-angot sa aktuwal nga nagakatabo sa lugar.
