Ginbawian sang kabuhi ang duha ka 18 anyos nga lalaki matapos ang aksidente nga ginakaulamiran sang duha ka motorsiklo kag isa ka tricycle sa Barangay Poblacion, Leon, Iloilo.
Magluwas sa mga napatay, may apat ka mga angkas nga padayon nga ginabulong sa hospital.
Sa interview sang Bombo Radyo kay Police Lieutenant Cosmeflor Marco Jr., Officer-in-charge sang Leon Municipal Police station, iya ginpahayag nga natabo ang aksidente sa R. Tabiana Street, Barangay Poblacion, Leon pasado 8:50 kagab i.
Suno kay Lieutenant Marco, ang nagamaneho sang isa ka motorsiklo amo si alyas Adrian, 18 anyos, kag residente sang Tu-og, Leon kag may isa ini ka backrider nga menor de edad.
Dugang niya, padulog sa Buga, Leon ang motor ni Adrian sang nag-overtake ini sa tricycle kun sa diin aksidente niya nga nasagaid ang backrider sang tricycle nga nag-resulta sang pagkadula sang iya control sa motor.
Pagkatapos mag-awas sa iya linya si Adrian, nabungguan naman sini ang nasumalang nga motorsiklo nga ginamaneho ni Alyas Ken, 18 anyos man kag may angkas nga duha ka indibidwal kun sa diin isa ang menor de edad.
Pahayag ni Lieutenant Marco, gindeklara nga dead on arrival si alyas Adrian kag alyas Ken bangud sang head injury kag iban pa nga mga pilas sa lawas nga ila naangkon.
Samtang, gindala naman sa Aleosan District Hospital ang mga backrider sang duha ka motorsiklo kag sang tricycle nga nakaagum sang head injury kag gasgas.
Sa subong, yara na sila sa estable nga kondisyon.
Suno kay Marco, wala pa man nakaistoryahanay ang duha ka pamilya bangod sang kasakuon kag kasubo, kag padayon man ang imbestigasyon sang kapulisan sa natabo nga aksidente.
