Padayon nga ginapangita sang Barotac Viejo Municipal Police Station (MPS) ang driver nga nakabunggo-patay sa 18-anyos nga estudyante sa Barangay Natividad, Barotac Viejo, Iloilo sang tinalikdan nga Nobyembre 8.
Sa amo nga insidente, nalakip ang isa ka awto kag isa ka motorsiklo nga ginamaneho sang estudyante.
Base sa inisyal nga imbestigasyon, ang awto pakadto sa Banate, samtang ang motorsiklo nagapadulong naman sa Barotac Viejo.
Sa interview sang Bombo Radyo kay Police Major Francis Batallones, hepe sang Barotac Viejo Municipal Police Station, wasak ang motorsiklo, samtang nag-angkon naman sang damage sa atubang nga bahin ang awto.
Dugang pa ni Batallones, gin-abandonar sang driver ang iya biktima, rason kun ngaa wala siya madakpan sang kapulisan.
Nagpakigbahin naman sanday Batallones sa pamilya sang biktima kag suno sa iya, handa sila sa pag-settle sang insidente.
Ginpaambit man ni Batallones nga ginapangabay sang pamilya nga kuntani buligan nalang sila sa mga galastuhon.
