Indi na magpasaka sang kaso ang pamilya sang lalaki nga nabunggoan sang isa ka truck sa Barangay Tabucan, Cabatuan, Iloilo.
Matapos ini nga mag-istoryahanay ang pamilya sang biktima kag ang pamilya sang truck driver.
Nahibaluan nga ang biktima amo si alias Arly, 22-anyos, nga nagtaliwan matapos makaangkon sang pilas sa ulo kag bali sa tiil bangud sa nasambit nga aksidente.
Sa interview sang Bombo Radyo kay PCAPT. Mary Shen Gerbolinga, Officer-in-Charge sang Cabatuan Municipal Police Station, iya ginpahayag nga padulong sa Iloilo City ang biktima sang mabunggoan ini sang isa ka truck.
Dugang pa diri, bangud sa mabaskog nga impact sang pagkabunggo, naguba ang atubang nga bahin sang motorsiklo, lakip na ang rueda kag tangke sini.
Wala naman nasamaran ang truck driver kag gilayon ini nga ginpaidalom sa kustodiya sang capulin matapos ang insidente.
Gintinguhaan pa nga madala ang biktima sa ospital, apang gindeklarar na ini nga dead on arrival sa Ramon Tabiana Memorial District Hospital.
