Nagdeklara na sang State of Calamity ang Lambunao, Iloilo bangud sa epekto sang prolonged drought nga nakaapekto sa masobra 2,600 ka mga mangunguma kag nagresulta sang masobra P46.1 million nga damage sa sektor sang agrikultura.
Sa interview sang Bombo Radyo kay Vice Mayor Arvin Losaria, iya ginpahayag nga sandig sa data sang Municipal Agriculture Office, humalin pa sang Hulyo nga na-eksperyensyahan sang Lambunao ang drought nga nagtuga sang dako nga kapyerdihan sa nagkalain-lain nga agricultural produce sa banwa.
Sa kabug-usan, 2,605 ka mangunguma ukon 37.8 percent sang total farmer population ang naapektuhan sang kalamidad.
Naglab-ot naman sa 1,763.66 hectares sang agricultural land ang apektado, nga may estimated total damage nga P46,134,107.83.
Pinakadaku nga naigo ang rice sector, nga may 2,469 ka mangunguma ukon 39.61 percent sang total rice farmer population ang naapektuhan.
Naglab-ot naman sa 1,682.12 hectares sang humayan ang apektado, nga may damage nga P43,025,237.79.
Sa corn production, 57 ka mangunguma ang naapektuhan, nga may 41.74 hectares nga apektado kag estimated damage nga P1.92 million.
Samtang, 80 ka mangunguma naman ang naapektuhan sa High-Value Crops (HVC), nga may 39.8 hectares sang agricultural land nga apektado kag P1.23 million nga estimated losses.
Ang pag-approve sang deklarasyon sang State of Calamity nagasandig sa Section 16 sang Republic Act 10121 ukon Philippine Disaster Risk Reduction and Management Act of 2010, nga nagahatag sang otoridad sa Local Sanggunian nga magdeklara sang State of Calamity base sa rekomendasyon sang Local Disaster Risk Reduction and Management Council (LDRRMC), kag sa resulta sang damage assessment kag needs analysis.
Santu sa resolution, kinahanglan ang deklarasyon agud ma-mobilize sang municipal government ang available resources kag madasig nga mahatagan sang emergency assistance ang mga apektado nga sektor, ilabi na ang mga mangunguma.
Gamiton sang Local Government Unit ang kabahin sang P6 million nga calamity fund agud makahatag sang interventions para sa mga apektado nga mangunguma.
Pahayag ni Vice Mayor Losaria, nakapakig-angot na ang local government sang Lambunao sa mga ahensya sang gobyerno lakip na sa Department of Agriculture, Department of Social Welfare and Development, kag sa Iloilo Provincial Government, agud makapangayo sang dugang nga bulig para sa mga apektado nga mangunguma.
Una na nga nakahatag sang 1,200 bags sang corn seeds ang Municipal Agriculture Office antes ang deklarasyon kag nagaplano pa gid nga mag-request sang dugang nga 1,500 bags agud ma-engganyo ang mga mangunguma nga magtanom sang mais bangud sa epekto sang El Niño.
Text by: Bombo Lynd-C Bade
