Ginkwestyon ni Iloilo 5th District Board Member Rolex T. Suplico kun naga-untat bala ang implementasyon sang circular kaangot sa Anti-Epal policy bangud nga may El Niño sa Pilipinas.
Ini ang kabahin sang sabat ni Suplico matapos nga nagpahayag si Iloilo 5th District Representative April “Binky” Tupas nga indi na sila “magsakay sa diskarte” ni Suplico bilang pagrespeto sa mga pumuluyo nga nagabatyag sang epekto sang El Niño kag iban pa nga mga pagtilaw.
Ang ginatumod ni Rep. Tupas nga indi sini pagsapakon amo ang privilege speech ni Suplico sa Sangguniang Panlalawigan nga may titulo nga “Pure Epal.”
Sa amo nga privilege speech, ginmuno sini ang mga dalagku nga tarpaulin nga may mga nawong ni Rep. Tupas kag iya bana nga si anay 5th District Rep. Raul “Boboy” Tupas, nga nagagamit sang alyas nga “BIBO,” kag nakabutang sa tupad ukon malapit sa mga proyekto sang gobyerno sa distrito.
“Karon, ang ini bala nga circular suspended bala ini tungod may El Niño, o nabudlayan ang Congresswoman magsabat?,” suno kay Suplico. “Indi. Ga-epekto gihapon ina. Kag wala sang exluded dira. Nobody’s above the law. Not even Congresswoman Binky Tupas.”
Gin-akusaran man sini ang kongresista nga naga-“evade” ukon nagalikaw sa pagsabat sa isyu sang tarpaulin.
Ginpamangkot man ni Suplico kun ngaa yara pa gid sa tarpaulin si former Rep. Boboy Tupas bisan nga private citizen na ini.
“Ang malain pa dira, dira ya ang iya bana eh. Ang bana ya private citizen na. Ngaa gasakay na da ya man? Ano na, conjugal dictatorship na?,” pahayag pa sini. “The last time I checked, ha. Ang 5th district, part pa sang Republika ng Pilipinas. Therefore, ang kasuguan, mga layi, mga regulations para sa bilog nga Pilipinas, ga-apply pa ina sa Quinto Distrito, including ang Anti-Epal Policy sang gobyerno.”
Ginpahayag pa sini nga bisan wala pa sang layi, “delicadeza” na lang kuntani bangud indi man halin sa amo nga kongresista ang pondo.
“Wala na lang ni ang layi bala, delicadeza na lang. Kay bal-an man sang tanan, indi na halin sa bulsa mo…. It creates a misimpression nga tanan ini halin sa ila, kag indi ni halin sa gobyerno, indi ni halin sa aton nga buwis,” dugang niya.
Matandaan nga sa iya privilege speech, ginpangabay man ni Suplico ang DILG kag ang mga Municipal Local Government Operations Officers (MLGOOs) nga hatagan sang tikang ang posible nga paglapas sa memorandum circular kag siguruhon nga ang mga proyekto sang gobyerno magpabilin nga neutral.#
