Nagpaandam ang Philippine Atmospheric, Geophysical and Astronomical Services Administration ukon PAGASA nga siyam ka lugar sa pungsod ang posible maka-eksperyensya sang dangerous level sang heat index subong nga adlaw sang Domingo, Nobyembre 15.
Base sa latest forecast sang PAGASA, posible mag-lab-ot sa 43 degrees Celsius ang heat index sa Zamboanga City kag Cotabato City.
Samtang, ginapaabot nga mag-lab-ot naman sa 42 degrees Celsius ang heat index sa Coron kag Puerto Princesa City sa Palawan, San Jose sa Occidental Mindoro, Dumangas sa Iloilo, Borongan kag Guiuan sa Eastern Samar, kag Dipolog sa Zamboanga del Norte.
Nahibaluan nga ginakabig nga dangerous level ang heat index nga naga-lab-ot sa 42 tubtob 51 degrees Celsius suno sa PAGASA.
Nagpaandam man ang ahensya nga ang ini nga kataason sang heat index mahimo magresulta sa heat cramps kag heat exhaustion bangod sa sobra nga kainit.
Mahimo man ini magresulta sa heat stroke nga delikado sa kabuhi sang tawo kun tuman na kainit ang tyempo.
Ginapanugyanan ang publiko nga maghalong, mag-inom sang nagakaigo nga tubig kag likawan ang malawig nga pagpati-al sa init sang adlaw, ilabi na sa oras sang udto.
