Nagpahayag sang suporta ang Association of Iloilo Provincial Government Employees (AIPGE) sa panindugan sang League of Municipalities of the Philippines (LMP) – Iloilo Chapter batuk sa pagpatuman sang 75-percent obligation requirement sang 20-percent Development Fund bilang isa sa mga kondisyon sa paghatag sang Collective Negotiation Agreement (CNA) Incentive sa mga kwalipikado nga empleyado sang local government units.
Sa ila statement, ginpabutyag sang asosasyon nga ginakabig nila nga importante ang panindugan sang LMP-Iloilo nga indi dapat pag i-depende ang paghatag sang CNA Incentive sa mga sitwasyon nga wala sa direkta nga kontrol sang mga government employees.
Suno sa AIPGE, ang CNA Incentive isa ka recognition sa collective efforts, productivity, efficiency kag cost-saving initiatives sang mga empleyado sang gobyerno kag indi dapat pagpunggan bangud lamang sa institutional ukon procurement-related delays.
Ginkilala man sang asosasyon ang importansya sang fiscal discipline kag responsible utilization sang government funds, apang kinahanglan may balanse sa tunga sang government accountability kag welfare sang mga empleyado.
Suno pa sa ila, kinahanglan ang isa ka fair, realistic kag equitable policy nga nagakilala sa kontribusyon sang public servants samtang ginaprotektahan man ang ila welfare kag rightful incentives.
“Recognizing public servants’ contributions should go hand in hand with protecting their welfare,” pahayag sang provincial government employees.
Ang statement sang asosasyon kasunod sang pagpagwa sang LMP-Iloilo sang position paper nga nagapanawagan sa Department of Budget and Management (DBM) nga repasuhon kag amyendaran ang 75-percent Development Fund obligation requirement bilang mandatory condition sa paghatag sang FY 2026 CNA Incentive.
Text by: Bombo Lynd-C Bade
