Nagpanawagan ang Meat Importers and Traders Association (MITA) sa Department of Agriculture (DA) nga kanselahon ang 60 ka adlaw nga ban sa pag-import sang karne sang baboy sa pungsod.
Suno sa grupo, posible nga magresulta ini sa kakulang sang suplay sang karne sa mga merkado kag makaapekto man sa mga lokal nga food processor.
Suno kay MITA President Emeritus Jess Cham, posible nga magsaka ang presyo sang karne sang baboy kag iban pa nga pagkaon bangod sa kakulang sang suplay nga magadugang sa gastuhon sang mga pumuluyo.
Ginsiling sang grupo nga mabudlay para sa lokal nga industriya sang baboy nga pun-an ang kakulang sang suplay bangud sa mataas nga gasto sa produksyon, foreign exchange rate, presyo sang mga kinahanglanon sa pagpadako sang baboy, Super El Niño, kag nagaluya nga ekonomiya.
Posible man suno sa grupo nga maapektuhan sang import ban ang mga micro, small and medium enterprises ukon MSMEs, ilabi na ang mga nagaproseso sang karne kag mga negosyo nga nagaserbe sang pagkaon nga nagasalig sa imported nga karne sang baboy bilang mas barato nga raw nga materyales.
Dugang sini, mahimo nga mabudlayan sa pagpadayon sang operasyon ang madamo nga magagmay nga negosyo, magbutang sa peligro sang trabaho sang ila mga empleyado, kag magpataas sa presyo sang pagkaon sa mga restaurant kag merkado.
Ginkwestyon man sang grupo ang gulpi nga pagpatuman sang import ban, lakip ang pagdumili sa mga shipment nga nagbiyahe pagkatapos sang Nobyembre 24, bangod may yara na sang mga kasugtanan ang mga importer sa ila mga supplier sa iban nga pungsod.
Suno sa MITA, mahimo ini magresulta sa daku nga kapierdihan sang mga negosyo kag makapaluya sa pagsalig sang mga international trading partner sa sistema sang regulasyon kag pagnegosyo sa Pilipinas.
Matandaan nga ginpatuman sang DA ang 60-day ban matapos matukiban nga may negatibo na nga epekto ang pag-import sang karne sang baboy sa lokal nga industriya.














