Gintawag ni Punong Barangay Joefel Ladiet nga matalunsay na ang dalagan sang konstruksyon sang flood mitigation structures sa Barangay Alalasan, Lapuz, Iloilo City matapos ini nga nangin kontrobersyal bangud sa delay sa trabaho.
Sa interview sang Bombo Radyo kay Ladiet, iya ginpahayag nga matapos nangin sentro ang amo nga isyu sa atrasado nga trabaho, makaduha ka beses na nga nagsapol ang local government unit kaupod sa concerned agencies lakip na ang Department of Public Works and Highways – Iloilo City District Engineering Office (ICDEO), MORE Power, Metro Pacific Iloilo Water, telecommunication companies, kag iban pa.
Suno sa opisyal, napaalinton naman sa tanan nga mag-coordinate gid kag magpangayo sang bulig kun may ma-encounter nga problema.
Dugang sini, nakit-an niya nga nagdasig ang trabaho, nagdugang ang manpower, kag gin-address naman ang mga obstruction nga isa sa mga gintumod nga rason sa delay.
Nagpangabay man si Ladiet sa iya mga pumuluyo sang dugang pa gid nga paghangop samtang padayon ang construction.
Pahayag sini, nagalaum sila nga sa Disyembre, makalab-ot na ang project construction sa Barangay Aguinaldo kag makabalik na sa normal nga pangabuhian ang taga-Alalasan.
Matandaan nga ginhatagan lamang ni Mayor Raisa Treñas ang ICDEO sang tubtub sa Marso 2027 agud nga makumpleto ang bug-os nga stretch sang proyekto lakip na ang porsyon tubtub sa Barangay Divinagracia, La Paz.
Ini matapos ginplastar sang ICDEO nga sa Pebrero 2027 ang ila nga revised completion date sa amo nga project.
Magluwas diri, gin-require man ang ICDEO nga magpasa sang progress reports sa kada duha ka semana sa baylo nga magpahibalo lamang sang status sang project kun magpangayo naman sila sang extension.














