Lakip sa gin-estoryahan nanday President Ferdinand Marcos Jr. kag Japanese Prime Minister Takaichi Sanae ang pagpabaskog sang relasyon sa seguridad kag ekonomiya sang Pilipinas kag Japan sa ika-49 ASEAN Summit.
Suno sa Presidential Communications Office (PCO), nagsugtanay ang duha ka lider nga palaparon pa ang kooperasyon sa depensa, seguridad, pag-uswag sang ekonomiya, kag energy security.
Ginpasangkad man liwat sang mga ini ang Comprehensive Strategic Partnership sang duha ka pungsod.
Nagpangako ang duha ka pungsod nga dugangan pa ang ila pagbinuligay agud matigayon ang ila mga pareho nga handum kag katuyuan.
Gintalakay man sang duha ka lider ang importante nga suporta sang Japan sa mga prayoridad sang Pilipinas para sa kauswagan.
Lakip diri ang mga panguna nga programa sa imprastraktura nga makabulig sa pag-uswag sang pungsod.
Nahiabaluan nga katuyuan sang ila pagtililipon nga mapasangkad pa ang madugay na nga relasyon kag pagbinuligay sang Pilipinas kag Japan.














