Gin-anunsyo ni United States President Donald Trump nga magahatag ini sang isa ka “major speech” sa iya pagbisita sa Pilipinas.
Ini ang pahayag ni Trump samtang ginapalig-on sang Manila kag Washington ang kooperasyon sa ekonomiya, lakip na ang ginaduso nga 4,000-acre Pax Silica Economic Security Zone sa Luzon.
Isa ini ka industrial hub nga ginatuyo nga mapabakod ang supply chains kag makaganyat sang mga investors sa importante nga mga industriya lakip na ang artificial intelligence.
Ginapaabot nga mag-abot si Trump sa Manila alas-5:30 sini nga hapon para magtambong sa 49th ASEAN Summit kag Related Summits.
Magatambong man ini sa ASEAN-U.S. Special Summit kag magapakigkita sa mga lider sang rehiyon antes magpadulong sa Shenzhen, China, para sa APEC Leaders’ Summit.
Si Trump ang katapusan nga world leader nga ginapaabot nga mag-abot para sa ASEAN gathering sa sini nga tuig.
Nag-upod man sa iya pagbiyahe sanday US Secretary of State Marco Rubio kag Treasury Secretary Scott Bessent, nga nag-upod sa presidente sa pagsakay sa Air Force One sa Joint Base Andrews sa Maryland.
Gindugang ni Trump nga posible nga magkitaay sila ni North Korean leader Kim Jong Un sa China, depende sa desisyon ni Chinese President Xi Jinping.
Gindugang man ni Trump nga ginapaabot niya ang pagpakigkita kanday Xi kag Russian President Vladimir Putin sa amo man nga biyahe, kun sa diin posible nga maistoryahan ang nagapadayon nga gyera sang Russia kag Ukraine, nuclear nonproliferation kag ang gyera sa Iran.














