Suportado ni Iloilo Governor Arthur Defensor Jr. ang panawagan sang League of Municipalities of the Philippines (LMP) Iloilo Chapter nga ikonsiderar liwat ang bag-o nga requirement sang Department of Budget and Management (DBM) angot sa Collective Negotiation Agreement (CNA) incentives.
Sa mando sang DBM paagi sa Budget Circular No. 2026-1, kinahanglan nga malab-ot sang local government units ang 75-percent obligation rate sa ila 20-percent Development Fund nga para sa mga development projects.
Kun indi malab-ot ang 75%, ma-disqualify ang mga local government employees nga makabaton sang amo nga incentives.
Sa position paper sang LMP Iloilo, ginplastar nila nga ang mando sang DBM ang indi patas para sa mga empleyado sang mga munisipyo bangud kaangay nga ginadagdagan sila sang penalidad sa mga butang nga wala man sila sang kontrol.
Gintumod sang LMP ang mga failed biddings, procurement delays, isyu sa right-of-way, kakulangan sang kontraktor, kag mga kalmidad nga pila sa madamo nga rason.
Sa interview sang Bombo Radyo kay Governor Defensor, iya ginpahayag nga magluwas sa suporta niya bilang gobernador, kinahanglan ang suporta sang iban pa gid nga mga probinsya agud i-apelar ang amo nga mando sang DBM.
Sa bahin naman sang provincial government, ginsiling ni Defensor nga nalapawan na nila ang 75% nga obligation requirement sang 20% development fund para ma-avail ang nasambit nga CNA incentive.
Apang suno sa gobernador, kun indi ma-avail sang mga municipal employees ang ini nga incentives bangud sa mando sang DBM, maapektuhan man ang provincial government.
Sa subong, plano ni Defensor nga makigsugilanon sa LMP Iloilo para sa masunod nga tikang nga ila himuon.
Nahibaluan nga ang maximum Collective Negotiation Agreement (CNA) Incentive ang tubtob sa ₱30,000 per qualified government employee para sa Fiscal Year 2026.













