Wala sang mangin Pax Silica Agreement sa state visit ni US President Donald Trump sa Pilipinas.
Ini ang ginkumpirma ni President Ferdinand “Bongbong” Marcos Jr. kag US Ambassador to the Philippines Lee Lipton kadungan sang pagbisita ni Trump sa Malacañang para sa isa ka bilateral meeting matapos ang pagtambong sini sa 49th ASEAN Summit and Related summits.
Kasunod man ini sang padayun nga pagpamatok sang pila ka grupo pinaagi sa hublag-protesta batok sa US-led initiative nga ginapahayag may mangin dako nga epekto sa Indigenous communities, tubig, kag amo man sa suplay sang kuryente.
Base sa nauna nga mga impormasyon, plano nga itukod ang Artificial Intelligence ukon AI industrial hub sa New Clark City, Tarlac.
Ini ang ginaproponer nga lugar nga magaserbe nga factory agud mag-produce sang computer chips kag advanced technology parts agud suportaran ang AI technology.
Madumduman nga antes pa nakapadulong si Trump sa Pilipinas, ginkwestyon ni Palace Press Officer Claire Castro ang nangin pagprotesta sang mga raliyista kasunod sang nagaguwa nga impormasyon nga magapirmahanay ang US President kag si President Marcos sa ila agreement sa proposed Pax Silica.
Suno iya, nagapadayun pa tubtob subong ang pagtuon sang mga awtoridad naangot sa nasambit nga inisyatibo.














