Nagdesisyon na lang ang isa ka tag-iya sang tyangge sa Jaro, Iloilo City nga untatan ang pagbaligya sang sigarilyo bangud sa kahadlok nga madagdagan sang daku nga multa sa tion nga malapas sini ang anti-smoking ordinance sang syudad.

Ini matapos ginpahibalo sang Iloilo City Anti-Smoking Task Force (ICAST) nga suguran na nila sa 2027 ang pagpangdakop sa mga establisimyento nga nagabaligya sang sigarilyo sang tingi-tingi ukon kada stick.

Sa interview sang Bombo Radyo kay Josie, tag-iya sang tyangge, iya ginpahayag nga mas madamo ang ila mabaligya kun tingi-tingi bangud madamo sa ila mga suki ang wala sang ikasarang nga magbakal sang isa ka bug-os nga pakete.

Suno sa iya, daku man ang epekto sini sa ila adlaw-adlaw nga income bangud isa ang sigarilyo sa ila mga baligya nga may mataas nga demand.

“Wala na, nakulbaan na kami nga ma-multa. Sa ahaw piso-piso, mamulta ka gid sa amo na nga kantidad bala. Te, budlay na, kundi likawan na lang. I-stop na lang. Bahala na nga wala sang sigarilyo, maapektuhan man ang benta, basta indi lang maka-multa. Sa highway pa man kami, ginaagyan pirme,” dugang niya.

Ginpahayag man niya nga nagareklamo ang ila mga suki bangud indi na sila makabakal sang sigarilyo sa kantidad nga naandan nila nga ginagasto kada adlaw.

“Te basi amo na na pag-untat sang bisyo nila, indi na sila maka-tingi, indi na kaya sang budget,” dugang sini.

Nagapanawagan man si Josie sa City Government nga istoryahan pa ang implementasyon sang ordinansa kag ikonsiderar ang sitwasyon sang mga magagmay nga negosyante nga wala sang daku nga kapital agud magbakal sang sigarilyo nga tingob.

“Istoryahan gid nila sang maayo kay apektado man kami nga gagmay nga business. Bug-at sa amon kun madakpan kami. Wala kami may mahimo kundi untatan na lang ang pagbaligya sang tingi-tingi, kay indi man namon masarangan ang pakete kay wala gani i-capital sang daku,” dugang sini.

Sa idalom sang Regulation Ordinance No. 2021-255 ukon Comprehensive Anti-Smoking and Vaping Ordinance of Iloilo City, ginadumilian ang pagbaligya sang mga tobacco materials nga ginakuha sa orihinal nga pakete ukon wala sang gin-aprubahan nga health warning.

Ang mga establisimento nga madakpan nga nagabaligya sang sigarilyo sang kada stick magapangatubang sang multa nga P5,000 kag dugang nga administrative penalty depende sa kadamuon sang ila paglapas.

Para sa una nga paglapas, pagasiraduhan ang negosyo sa sulod sang isa ka adlaw, samtang isa ka bulan naman nga pagsira ang idagdag sa ikaduha nga paglapas, magluwas sa multa nga P5,000.

Sa ikatlo kag mas masunod pa nga mga paglapas, posible nga kanselahon ukon bawion ang business permit kag lisensya sang establisimento, magluwas sa sa multa nga idagdag batok sa violator.#