Ginpaboran ni Committee on Health Chairperson City Councilor Alan Zaldivar ang pagpatuman sang probisyon sang Anti-Smoking Ordinance nga nagadumili sa pagbaligya sang ‘tingi-tingi’ nga sigarilyo.
Apang ginklaro niya nga kinahanglan anay mahatagan sang bastante nga abiso kag edukasyon ang mga apektado nga sari-sari store owners.
Sa interview kay Zaldivar, isa siya sa mga nagduso sang Regulation Ordinance No. 2021-255 nga nag-amendar sa pila ka probisyon sang Regulation Ordinance No. 2017-202 ukon ang ordinansa nga nagapatuman sang Comprehensive Anti-Smoking Ordinance sa Iloilo City, nga ginbase sa Universal Health Care kag Graphic Health Warning Law.
Ginpaathag man sini nga ang pagdumili sa pagbaligya sang ‘tingi-tingi’ nga sigarilyo yara na sa Section 5 sang nasambit nga ordinansa, gani indi ini bag-o nga regulasyon, kundi isa ka probisyon nga ipatuman sa 2027.
Suno kay Zaldivar, suportado niya ang Iloilo City Anti-Smoking Task Force (ICAST) sa pagpalig-on sang implementasyon sini agud maprotektahan ang ikaayong lawas sang publiko kag mapanami ang kalidad sang hangin sa siyudad.
“It’s not only the business side. We also have sentiments for them. Gina-consider ko gid ang healthy environment sa siyudad, especially sa youth,” pahayag ni Zaldivar.
Apang gin-athag niya nga indi man dapat gulpihon ang implementasyon bangud kinahanglan hatagan sang husto nga tion ang mga sari-sari store owners nga maintindihan ang kahulugan kag sakop sang ordinansa.
Gani, ginpahayag sini nga antes ang hugot nga pagpatuman, kinahanglan ang husto nga advisory kag information drive, lakip na ang consultative meeting sa mga sari-sari store owners agud malikawan ang sayop nga paghangop sa mga probisyon sang ordinansa.
Bisan pabor sa gilayon nga implementasyon, ginklaro ni Zaldivar nga dapat updan ini sang husto nga pagpahangop sa publiko, ilabi na sa mga gagmay nga negosyante nga apektado sang regulasyon.
𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬














