Nagdugang ang isa ka isla sa Iloilo nga gin-deklarar nga rabies-free matapos makompleto ang 100 percent dog vaccination coverage sa Sitio Magalumbi, isa ka island sitio sang Barangay Tanao sa banwa sang Batad.

Bangud sa 100 percent vaccination coverage sang mga ido, opisyal na nga gin-deklarar ang Sitio Magalumbi bilang ika-40 nga rabies-free island sa probinsya sang Iloilo.

Ginapakita sang sini nga achievement ang importansya sang community participation kag padayon nga suporta sang gobyerno agud malikawan ang paglapta sang rabies, ilabi na sa mga island communities nga malayo sa mainland.

Ginpatigayon ang regional evaluation nanday Dr. Gheriel Resulta sang Department of Agriculture, Ame Liz Mardoquio, Regional Rabies Program Manager sang Department of Health Western Visayas, kag Dr. Marie Jocelyn Te, medical consultant sang DOH-WV.

Nagpartisipar man sa assessment ang mga representatives sang Provincial Rabies Coordinating Committee paagi sa Office of the Provincial Veterinarian-Iloilo kag Iloilo Provincial Health Office.

Suno sa Iloilo Provincial Government, ginapakita sang sini nga milestone ang ila padayon nga commitment sa pagproteher sang health kag safety sang tawo kag sapat pinaagi sa vaccination, responsible pet ownership, kag mas ginpabakod nga rabies prevention programs.

Padayon man ang panawagan sa mga pet owners nga pabakunahan ang ila mga ido kag mangin responsable sa pag-atipan sang ila mga hinuptanan agud malikawan ang rabies sa komunidad.