Ginkumpirmar ni Department of Trade and Industry (DTI) Undersecretary Dr. Ceferino Perry Rodolfo sa impeachment trial sa Senado nga nalista ang bana ni Vice President Sara Duterte nga si Atty. Manases Mans Carpio bilang presidente sang Cale 88 Foods Corporation sa General Information Sheet ukon GIS sang kompanya sang 2024.

Suno kay Rodolfo nga amo ang ikawalo nga testigo sang defense team, tag-47.5 percent ang shares of ownership nanday Carpio kag Dr. Lourdes Lebosada sa nasambit nga kompanya sang 2024.

Apang, sa 2025 GIS sang kompanya, nalista naman bilang mga stockholder sanday Lolita Paimalan kag Pikimong Pikimong Philippines Corporation nga may singko porsyento kag 95 percent nga ownership.

Sa pagpamangkot sang defense team, ginhingyo kay Rodolfo nga i-identify ang mga indibidwal nga nalista bilang tag-iya sang Cale 88 Foods antes ang mga pagbag-o nga makita sa 2025 records sang kompanya.

Ginpaathag man ni Rodolfo nga kinahanglan bantayan sang Board of Investments ukon BOI ang mga matuod nga tag-iya sang mga kompanya nga rehistrado sa ahensiya agud masiguro nga husto nga na-report kag narecord ang mga pagbag-o sa ownership.

Gintumod man niya ang Capital Structure Annex B nga kalakip sang sulat nga may petsang Hulyo 8, 2026, nga nagapakita nga may lima ka percent nga shares of ownership si Paimalan sa Cale 88 Foods.

Matandaan nga ginaalegar nga may paid-up capital nga P125,000 ang Cale88.

Sa mga rekord nga ginpresentar sa trial, nagapakita nga naglab-ot sa P776 million ang pagsulod sang kuwarta sa kompanya, samtang P154-million naman ang nagguwa nga pondo. Samtang ang kabug-usan nga sales sang kompanya gin-report nga yara sa P23 million.

Nauna naman nga nagtestigo ang Anti-Money Laundering Council (AMLC) nga nakabaton ang Cale88 sang yara sa P319.32 million nga mga padala halin sa China kag Hong Kong.#