Ginkumpirma sang isa ka testigo sang defense team ni Vice President Sara Duterte nga ang pangalan sang CALE88 Foods Corporation naghalin sa mga apelyido nanday Atty. Manases Carpio kag sang iya business partner nga si Lourdes Lebosada.
Sa ika-45 nga adlaw sang impeachment trial batok kay Duterte, gin-athag ni Department of Trade and Industry Undersecretary for Industry Development and Promotions Ceferino Rodolfo nga ang mga letra nga CA sa CALE88 nagarepresentar sa apelyido nga Carpio, samtang ang LE naman naghalin sa apelyido nga Lebosada.
Suno kay Rodolfo, ang numero nga 88 nagasimbolo sa infinity ukon wala sing katapusan, nga ginakabig man sang madamo nga lucky number.
Ang CALE88 isa ka kompanya nga nagahimo sang banana chips kag nalakip sa Statement of Assets, Liabilities and Net Worth ukon SALN ni Duterte.
Suno sa mga rekord, tag-47.5 porsyento ang shares of ownership nanday Carpio kag Lebosada sa kompanya.
Madumduman nga ginkwestyon ni anay Senador Antonio Trillanes IV ang operasyon sang CALE88, lakip na ang manubo sini nga bayranan sa kuryente, gamay nga paid-up capital, wala sang trade receivables kag payables, kag wala sang regular nga empleyado bisan nagahimo ini sang banana chips.
Mas ginatutukan man ni Trillanes ang ginapatihan nga kapin P319 million nga cash remittances nga nabaton sang kompanya halin sa China.
Ginpalig-on pa sang Anti-Money Laundering Council ukon AMLC ang una nga alegasyon ni Trillanes matapos kumpirmahon nga nakabaton ang CALE88 sang kapin P319 million halin sa China. Apang sa cross-examination, nakakuha ang mga abogado ni Duterte ang kumpirmasyon nga wala sang dokumento nga nagapakita sang pagka-link sang gobyerno sang China sa CALE88.#














