124 lamang sa 1,721 barangay sa Iloilo ukon katumbas sang 7.2 porsiyento ang nakakuha sang Grade 2 certification sa idalom sang Philippine Approach to Sustainable Sanitation ukon PHATSS.

Base sa data as of Nobyembre 10, yara sa 1,597 barangay ukon 92.8 porsiyento pa ang wala nakakuha sang amo nga sertipikasyon nga naga-require sang mga balay kag pampubliko nga establisimyento nga mag-angkon sang kasilyas, likawan ang pagpamuhin sa bisan diin lang nga lugar, insakto nga pagdumala sang basura kag pagpabilin nga matinlo palibot.

Suno kay Iloilo Provincial Health Office head Dr. Maria Socorro Colmenares-Quiñon, kabahin ini sang programa nga Zero to Limpyo 2.0 sang provincial government agud mapaayo ang katinlo sa mga komunidad kag mabuhinan ang mga sakit nga dulot sang higko nga palibot.

Kabahin sang certification ang strikto nga verification sang sanitation practices kalakip na ang responsible nga pagtatap sang mga sapat.

Nagpanguna naman ang Tubungan matapos mangin pinakauna nga munisipalidad nga nakakuha sang Grade 2 certification halin sa Department of Health para sa tanan nga 48 ka mga barangay sini.

Ginpahayag ni Quiñon nga nakabulig man ang mas maayo nga sanitasyon sa paglikaw sa dengue, kun sa diin 31 ka kaso lang ang narekord sa banwa.

Dugang ni Quinon, nakabulig ang insakto nga pagdumala sang basura agud madula ang mga pugad sang lamok kag malikawan man ang mga balatian nga tuga sang mahigko nga tubig kag pagkaon.

Suno pa sa iya, katuyuan man sang programa nga mag-improve ang ikaayong lawas kag nutrisyon sang mga pamilya, ilab na ang mga bata.