Ginpanginwala sang Office of the Vice President (OVP) nga may kaangtanan ang ila “Pagbabago: A Million Trees Campaign” sa tree-planting requirement sang Board of Investments (BOI) para sa Cale88 Foods Corporation.
Ang Cale88 amo ang kompanya sang banana chips nga gina-link sa bana ni Vice President Sara Duterte nga si Manases Carpio, kag amo ang isa sa naistoryahan sa impeachment trial sa bise presidente kaangot sa ginapahayag nga unexplained wealth.
Sa isa ka statement subong nga adlaw, Nobyembre 21, ginlaragway sang OVP nga “misleading” kag wala sang basehan sa kamatuoran ang mga paninguha nga i-angot ang duha ka programa.
“Any attempt to link the Vice President’s participation in the OVP’s environmental initiatives to Cale88 Foods Corporation’s BOI compliance is misleading, malicious, and has no factual basis,” suno sa OVP.
Kahapon, matandaan nga ginpamangkot sang prosecution lawyer nga si Erwin Matib si Trade Undersecretary Ceferino Rodolfo sa impeachment proceedings kun may kaangtanan ang tree-planting activities ni Duterte sa pagsunod sang Cale88 sa BOI requirement nga nagamandu nga magtanom ang mga negosyo sang indi magnubo sa 100 ka forest trees agud mangin kwalipikado sa incentives.
Suno kay Rodolfo, kinahanglan pa niya usisaon ang mga kondisyon sang kompanya agud mahibaluan kon nakatuman ini sa nasambit nga requirement. Wala man siya sang personal nga impormasyon parte sa compliance sang Cale88, apang mahimo niya ini ma-verify paagi sa notarized statement nga ginpasaka sang kompanya.
Ginpahayag naman sang OVP nga ang “Pagbabago: A Million Trees Campaign” isa ka independente nga programa para sa pag-amlig sang palibot nga ginlunsar sang Marso 27, 2023, agud suportahan ang paninguha sang Department of Environment and Natural Resources (DENR) nga mapanubo ang carbon emissions kag maatubang ang climate change.
Suno sa OVP, nakatanom na ang kampanya sang kabug-usan nga 1,386,682 ka kahoy sa bilog nga pungsod, upod ang nagkalain-lain nga ahensya sang gobyerno kag pribado nga sektor.
Dugang pa sang opisina, magapadayon ini sa pagtuman sang iya katungdanan nga maghatag sang episyente, masarangan ma-access kag nagasabat sa kinahanglanon sang publiko nga serbisyo bisan pa sa mga alegasyon kag pulitika nga nagapalibot sa isyu.
“Amid these allegations and political insinuations, the OVP remains steadfast in fulfilling its mandate of delivering efficient, accessible, and responsive public service for the good of all Filipinos,” dugang sa statement.#














