Nagpabutyag ang smoker nga apat na ka tuig nagapanigarilyo nga posible mahagan-hagan ang iya nga bisyo bangud sa mas istrikto nga pagpatuman sang ordinansa sa syudad.

Ang ginatumod sini amo ang Regulation Ordinance No. 2021-255 ukon ang pagdumili sang pagbaligya sang tingi-tingi sa tiyangge agud maprotektahan ang mga pamatan-on sa bisyo sa pagpanigarilyo.

Matandaan nga una na nagpahayag ang Iloilo City Anti-Smoking Task Force (ICAST) nga sa pagsugod sang 2027, multahan na ang mga nagabaligya sang tingi-tingi ukon per stick.

Sa interview sang Bombo Radyo kay alyas ‘Jovin’, iya ginpahayag nga mabug-at na sa para sa iya nga bulsa kun magbakal sang isa ka bug-os nga kaha.

Iya man gindetalye nga P10 ang bili sang kada isa ka stick kag P200 naman sa kada isa ka kaha.

Ginpahayag man sini nga sa isa ka adlaw, nagalab-ot 4 tubtob 6 ka stick sang sigarilyo ang iya nga makonsumo kun sa diin 40 tubtob 60 ka peso ang iya magasto.

Dugang pa niya, kun mapatuman na ang ordinansa, wala na siya sang mahimo kundi magsunod na lang.

MULTA SA VIOLATORS

Sa idalom sang Regulation Ordinance No. 2021-255 ukon Comprehensive Anti-Smoking and Vaping Ordinance of Iloilo City, ang mga establisimento nga madakpan nga nagabaligya sang sigarilyo sang kada stick magapangatubang sang multa nga P5,000 kag dugang nga administrative penalty depende sa kadamuon sang ila paglapas.

Para sa una nga paglapas, pagasiraduhan ang negosyo sa sulod sang isa ka adlaw, samtang isa ka bulan naman nga pagsira ang idagdag sa ikaduha nga paglapas, magluwas sa multa nga P5,000.

Sa ikatlo kag mas masunod pa nga mga paglapas, posible nga kanselahon ukon bawion ang business permit kag lisensya sang establisimento, magluwas sa sa multa nga idagdag batok sa violator.