Gin-athag sang Armed Forces of the Philippines nga prayoridad sini ang pagpalig-on sang mga missile system kag iban pa nga mga kagamitan sa pagpakig-away agud maprotektahan ang teritoryo sang pungsod batok sa posible nga mga pamahog.
Suno kay AFP Chief General Antonio Nafarrete, naka-focus sila sa pagbakal sang mga bag-o nga armas sa mga kagamitan para sa depensa, lakip na ang mga missile, artillery kag bomba.
Ginpunto man niya ang kinahanglanon nga mag-angkon ang pungsod sang bastante nga kapasidad sa pagdepensa agud mapunggan ang bisan ano nga pagpamahog sa kadagatan paagi sa ginatawag nga active defense strategy.
Lakip sa mga tikang sang Pilipinas ang pagkuha sang BrahMos shore-based anti-ship missile systems halin sa India bilang kabahin sang AFP Modernization Program.
Samtang, gin-anunsyo sang Estados Unidos ang plano nga maghatag sang masobra sa $2 bilyon nga military financing package kag dugang nga $400 milyon agud mapabakod ang kapasidad sang Pilipinas sa pagdepensa sa West Philippine Sea kag South China Sea.
Apang ginpaathag sang mga opisyal nga ang mga plano nga pag-utang kag pagbakal sang mga nasambit nga kagamitan kinahanglan pa nga mag-agi sa negosasyon kag proseso.














