Matapos ang pito ka tuig sa space, nagbalik na ang National Aeronautics and Space Administration (NASA) capsule sa Utah, USA dala ang pinakadaku nga samples sang asteroid nga natipon.
Daku ang ginalauman sang scientists sa amo nga sample bangud ini posible ang makapahangop kun paano nahimo ang solar system, kun paano nangin posible ang kabuhi diri sa kalibutan.
Suno sa space agency, ang OSIRIS-REx — nga nagakahulugan sang Origins, Spectral Interpretation, Resource Identification, Security, Regolith Explorer — ang ginlunsar sang 2016 kag naglibot sa asteroid nga Bennu sang 2018.
Ang Bennu nga 500 metros (1,640 ka tapak) in diameter ang manggaranon sa carbon — building block sang kabuhi diri sa kalibutan — kag may yara man ini sang water molecules.
Halin sang 2016 launch, nakatipon ang probe sang 250 gramos sang yab-ok halin sa batuhon nga surface. Bisan amo lang sini kagamay suno sa NASA, makabulig ini sa pagtuon sa sahi sang asteroids nga pamahog sa Earth kag matun-an man ang maragtas sang solar system.
Gintipon sang spacecraft ang sample sang 2020 kag nag-umpisa sa misyon nga makabalik sa Earth sang Mayo 2021.
Ang kabug-usan nga mission ang nagdangat sa 3.86 billion miles — kabug-usan pakadto sa Bennu kag pabalik sa kalibutan.
Suno pa sa NASA, maragtason ang pag-abot sang amo nga samples kag amo ini ang pinakadaku nga sample halin sang nadala man sang Apollo ang mga bato halin sa bulan.
Kadam-an sang sample ang gamiton sa pagtuon para sa masunod nga mga henerasyon. Ang ginapahayag one-fourth sini ang gamiton sa eksperimento kag may gamay naman nga amount nga ipadala sa mission partners nga Japan kag Canada. #
